佢哋個餐牌入面都幾多選擇，唔同我之前食過嘅餃子舖，佢哋有招牌之選，入邊有好多唔同餡料嘅餃子，當中最特別嘅就係有紫菜餃，喺其他鋪頭都好似未見過！不過我又想食佢哋個椰菜木耳餃，又想試吓新野，所以最終就揀咗番茄湯嘅餃子樂園
已朋友就想試吓佢哋個芝士餃子，所以呢就揀咗一個三重芝士煎餃配米線，湯底就揀咗酸辣湯
佢哋個餃子有招牌之選入邊全部八款，但係今日可能太夜啦，冇咗素餃，於是侍應就俾我揀多一款，我梗係試吓椰菜木耳餃啦！首先值得一讚嘅係椰菜木耳餃真係好好味，個餡料非常充足，調味都啱啱好，但係最大個問題係皮太厚！！！！有幾隻仲要個接合位有啲唔熟，呈現麵粉嘅白色，而唔係熟透嘅白色
其實佢啲餡料真係唔錯，不如試吓整薄啲個皮？另外個番茄湯只係飄浮左幾舊蕃茄，味道冇新鮮蕃茄味， 十分單薄，鍾意番茄嘅fans可能會有啲失望啦
我就冇乜點試朋友嗰個煎餃，不過聽佢講都不錯，可能厚皮嘅餃子係比較適合煎，而唔係放湯，大家都可以試吓佢個煎餃嘅！不過聽說佢個酸辣湯都係比較單薄，可能餐廳要好好研究下個湯底可以點樣改善啦！
