一起 (已結業)

港式口味串燒其實係一個大熔爐，海納百川口味，蒜蓉、鹽、辣椒、麻子、黑椒、味淋、香草、孜然、燒汁、泰式辣醬bla bla bla，中西日韓泰式風情共冶一爐。變相呢，同一間串燒店通常會有啲好食有啲麻麻。不過都有例外，成功發現一間會想回頭嘅串燒店，位於大角咀海富花園嘅小店，各種「風味」都做得幾出色！最愛係個厚薄度啱啱好嘅 #牛舌，仲好CLS地有埋金箔裝飾。其次 #脆邊五花腩 同 #山椒燒豬頸肉好惹味，五花腩微焦脆邊入口似食緊塊好juicy嘅豬乾，另外豬頸肉肥瘦平均。蔬菜類最深刻係 #蒜蓉燒原條茄子，開邊茄子份量十足啖啖都爆多蒜；另外 #燒菠蘿 fans褔音係呢度有原味、話梅同肉桂3款口味，試食最愛嘅肉桂，好有apple crumble嘅感覺。餐廳仲放滿好多清酒，鍾情sake嘅朋友喺飲品上有好多選擇，另外仲有beer同大大杯嘅檸茶檸水，啱晒邊食邊解膩。