塩玉居酒屋 (已結業)

一登龍門，升價十倍。進駐銅鑼灣核心地帶，位於登龍街眾多食肆，每間都想自己嘅身價升價十倍，但前提要野食水準有一定水平。今日呢間居酒屋絕對係高水準。餐廳叫塩玉居酒屋。門面配合一d聖誕裝飾，好有節日氣氛。旁邊有好多繪馬，整成一幅牆，好有心思，上面有2個東瀛特色嘅面具（有點嚇人）。入面環境都相當唔錯，好有氣氛。位置相當闊落，唔會覺得逼。菜牌，選擇都好多樣化，價錢都算公道。落單時位靚仔，強烈推薦我地試一個日本蛋黃天婦羅。呢個就係日本蛋黃天婦羅，材料簡單，但手工非凡，以脆弱嘅雞蛋黃沾上薄薄一層天婦羅炸漿，外脆心軟。將佢一啖咬爆在口中，再吞落肚，係對日本廚界職人超凡入聖嘅手藝，致以最高嘅敬意。食落仲有淡淡鹽嘅咸香，塩玉不愧叫塩玉，鹽加蛋，妙絕妙絕。38蚊一個蛋黃絕對物有所值。刺生拼盤，全部魚生都好新鮮，好似條魚在嘴里游動一樣美妙。壽司拼盤，樣樣都非常精緻，又新鮮，仲有矜貴嘅三文魚子同埋海膽軍艦。好好味仲叫咗個鯛魚茶潰飯，以綠茶做底，配以兩片新鮮嘅鯛魚，清淡中帶出一陣又一陣嘅鮮甜味，令人欲罷不能。總結，好滿足嘅一餐，食完成晚都在回味。好想搵日再嚟食飯。