HABITŪ table (ELEMENTS圓方) (已結業)

週五晚約了朋友食飯，因為要方便泊車的關係，所以嚟咗Elements商場。疫情期間呢個商場非常冷清，8點幾嚟到，好多商店都已經關門，只有少量食肆仲有開門。唔少餐廳都係行高檔路線，價錢偏貴，咁最終我地就揀左呢間餐廳食。點了四樣野，首先食磨菇Pizza。賣相正常，味道偏咸，上菜時已經唔熱。雞翼。味道正常，但都係唔算熱，唔知係咪落單時都比較夜，加上餐廳根本無乜人，所以咁樣。蘋果配豬。豬扒味道唔錯，有咬口，蘋果都幾好食，幾清香。最後點了兩杯飲品：抹茶豆奶Latte同薑黃豆奶Latte，個人覺得後者真係超好飲，好香好暖胃，適合女仔冬天飲。食後分享：1. 圓方泊車優惠幾抵，有車一族係方便既，不過就唔好太夜先嚟，成個商場無乜人氣，感覺無咁好。2. 餐廳位於溜冰場上方，第一次去會有Ｄ難搵，最好問商場職員指路。3. 餐廳位置坐得好舒服，適合傾計。不過不設洗手間，最好去完廁所先入座，因為最近的廁所喺下一層樓，行過去都幾遠下。