添好運點心專門店 (已搬遷) 新店位置

是日極好興緻地一個人黎添好運食點心，其實係因為諗起佢咁近我，而我又好耐無食過，諗住睇下唔駛排隊既就食下。隔左咁耐佢依然好出名，身邊仍然有人同我投訴仲未食到，仲有人叫我幫佢排隊囉，哈，不過通常我都會同佢地講其實要排咁耐既不如去食過第二間好過啦。是日下午黎到門口見真係無咩人，而我又得一個人，所以好快就有位啦，等左都無十分鐘就有得入去食。不過我入去食左一陣之後又見出面開始多返人排隊，真係黎都要識揀時間~環境依舊迫夾到不得了，原本好想食酥皮叉燒包，不過自己一個人食唔哂而且太熱氣，最後都放棄左，畫左 3 樣點心慢慢食。3 樣中覺得蝦餃最唔好食呀，雖然個皮唔算好厚，D蝦亦都大隻又幾爽口，不過就真係得個爽字，應該唔係太新鮮，覺得食落味道怪怪的。而且呢個蝦餃除左蝦之外真係咩都無，所以我麻麻地鍾意。另外仲叫左馬拉糕同埋黃沙豬膶腸，馬拉糕基本上係我黎親必叫既點心之一，因為覺得好味~ 今次亦都一樣，覺得最好味係佢，食落好軟滑而且做得好幼細，質地有少少濕潤，甜度又適中，唔會好似出面咁覺得自己食緊雞蛋糕囉。黃沙豬膶腸都幾好味，腸粉做得晶瑩剔透，皮夠薄，而豬膶亦夠多，食落爽口無澀味，所以呢個亦係我常叫既點心之一。