武士拉麵 (已結業)

因工作需要，今日要去九龍灣展貿中心。做完野之後好肚餓，就決定同同事喺到提早食埋晚餐先走。原來呢個商場都有幾多餐廳，今次揀左呢間食拉麵。由於時間尚早，店內冇咩人，可以自己揀坐吧位睇住師傅煮拉麵/普通座位。呢度既拉麵選擇都算好多，共有十款，包括湯麵，沾麵，辣，唔辣，全部都以日本將軍名命名。麵亦可以自己選擇粗/幼，麵質軟厚度同湯底濃度，總可以揀到一碗岩心水既麵。我自己揀左武田將軍，姐係北海道牛乳湯麵，麵質揀左粗身。湯底乳白色，好香濃既牛奶味。最令人回味既係加錢要既溏心蛋，蛋黃做到剛剛好半生熟，d蛋白仲好嫩滑，而且好夠味，浸埋落d牛乳湯到味道好夾。而朋友就要左辣既九洲地獄拉麵，麵選擇左幼麵。我食左一啖，覺得都唔算太辣，湯底好濃郁。不得不提2碗麵既厚切叉燒都好好食，外層燒到焦焦地，肥瘦適中，好好食。而枱上都有幾款特別調味料，左起包括沙甸魚油，黑椒油，辣椒油同拉麵專用胡椒粉。建議大家可以分4次逐樣試下，會提升左麵既味道，仲冇咁油膩。我地最後仲要左2個小食，有拉麵既好朋友煎餃子，個底煎到脆脆的。另一個係芝士炸蝦丸。記得要襯熱食，d芝士可以拉得好長，而且蝦丸都好彈牙！呢度既環境好好，岩哂同朋友傾住食。