潮興魚蛋粉 (已結業)

我夜，點知太座仲夜，等到成十一點至可以一齊食野，好在事先已吃了幾串串燒頂肚。同埋太座的一個同事，原本去新東大食小炒，不過第三者話喉嚨唔舒服，所以就清清地去食粉。在東大街，當兩間安利同王林記都收左檔，剩下的選擇就只有這裡。時近午夜，人客不少。有大電視睇，可能是原因之一。叫左個牛爽腩魚麵、紫菜魚蛋牛丸米同個蠔仔肉碎粥。因為人多，都等左幾耐至有得食。牛爽腩集牛腩、肥牛及軟骨於一身，味道好正。魚麵不太粗身，有魚味但不夠爽口彈牙，不過價錢平平地﹝只加八蚊﹞，不能苛求了；這裡的其中兩味拿手菜是手打魚蛋及手打牛丸，但兩款吃落俱不夠實淨及彈牙，同樂園還差幾皮。反而後加的紫菜味道不錯，無沙之餘又甜，加幾蚊就有，幾抵；蠔仔肉碎粥25蚊一碗，估不到幾大碗。味道不錯，蠔仔幾大粒又鮮味，粥底就一定有味精，但不多，可以接受，都食得過。兩位阿姐服務不錯，叫了要「多青」，真的是幾碗都好多蔥及芫萎。又這裡全店吸煙，是日所見，男女老少，藍領白領學生全店皆吸，介意二手煙的，睇定至好幫襯。加埋三碟菜同三杯凍飲，埋單剛好一百元正，三個人吃得飽飽，都算經濟抵食。不過當然如果隔離安利同王林記還有得食，就點數都未輪到來這裡啦！