當下 (和富道) (已結業)

北角係開倉運動鞋嘅集中地，瘋狂掃貨後要食番餐好嘅，為「辛勞」的一天劃上完美的句號。今次我地點左個5 course套餐，包餐湯伴法包、田園沙律、餐前小吃、主菜、甜品同飲品，屬於完整而全面嘅套餐。今日餐湯係蕃茄濃湯，質感滑溜又濃稠；沾上法式蒜蓉包味道匹配。沙律用上芝麻醬撈沙律菜，好新鮮呀！小食就揀咗香酥蟹肉餅，外層煎得金黃色，內裏則是鮮甜嘅蟹肉絲，好似食緊蟹肉蛋糕😆終於輪到主菜，原來「極黑和牛」肉眼牛排(12安士)係日本和牛同安格斯牛嘅混種 ，今次叫左7成熟，仲有少量血水流出嚟，牛油脂分佈得好平均，塊牛扒好厚身，口感細嫩而牛味濃郁，值得推薦！手工精品蛋糕甜點師做得出色，朱古力香濃而不會過份甜，食落很順滑。