板長壽司 (新都城中心二期) (已結業)

今日約埋個2個朋友去將軍澳買野，中午經過板長壽司見只係等一陣位就入去食。先來個炸軟殼蟹，炸粉太多啦！只係食到粉狀，而且唔多脆，麻麻地。壽司就點咗例牌的三文魚壽司，蝦壽司，火炙三文魚同火炙蝦等。全部火炙壽司都唔錯，燒得剛剛好，黎到時又熱熱地，不過上層芝士就有D燶。三文魚壽司好新鮮鮮甜，D飯亦唔會好易散開晒。鵝肝壽司真係要大讚，好Juicy，鵝肝外脆內軟，散點燶燶地，又啖啖肉，夾埋舊飯，一口咬落去真係享受！我哋都點咗幾件軍艦壽司，包括蟹子軍艦，吞拿魚軍艦，龍蝦沙律同芝士蟹子軍艦。蟹子軍艦蟹子粒粒分明，好爽口，而吞拿魚軍艦亦好新鮮，包住的紫菜亦尚脆。另外二舊壽司小弟就無食到啦！餐廳服務唔錯，一舉手就有侍應黎加水，不過卡位有點兒逼，整體都坐得舒服！