浜焼き (已結業)

又發現新既浜燒餐廳,今次終於唔係港島區喇,尖沙咀都分一杯羹!一於試吓佢先!先來個蟹肉沙律,超級多嘅蟹肉,加埋新鮮嘅沙律菜,又有車厘茄同埋蟹籽, 加上我最愛既胡麻醬汁,refresh一下口腔,準備食浜燒~見佢有個特上浜燒盛合二人前 ,乜都有啲咁,咁唔好諗啦就嗌呢個喇!都幾豐富下有虎蝦兩隻,帆立貝兩隻,鮑魚兩隻,魷魚一隻,同埋一個甲羅燒!首先店員幫我地燒左個帆立貝先,都係一般嘅做法,燒到咁上下就落清酒同埋醬油,然後大概八成熟左右咁就可以食啦!唔使好多嘅調味,就咁就可以食到帆立貝嘅鮮味!跟住就到原隻嘅魷魚,店員一路燒一路搽上醬油,燒到咁上下就剪成一圈圈咁,然後就食得啦!就咁配上少少薑蓉食,美味!接住落嚟就係鮑魚同埋虎蝦,鮑魚冇乜特別,係幾新鮮嘅,反而隻蝦就有驚喜啦!驚喜在於店員燒到咁上下會幫隻蝦去埋殼!去完殼之後再燒多一陣,然後就可以啖啖肉咁食啦!最後就到個甲羅燒,蟹膏超美味!呢度有新食法,就係將啲蟹膏配上薯片黎食啦!原來咁樣食蟹膏又幾好味,平時一啖一啖蟹膏咁樣放入口,都會有好heavy既感覺,但係配上薯片食,可以食完一塊又一塊! 原來呢度仲有串燒食架,下次上嚟食串燒先~