博多拉麵別天神 (已結業)

博多拉麵別天神真係充滿咗我嘅工作回憶。想當年喺九龍灣做到好夜，就會同同事去德福廣場嘅一風堂食，已經覺得滿足返一日嘅疲勞。當我以為一風堂好好食我同事同我講一間拉麵，你食過之後你會覺得一風堂係垃圾，好奇之下就走去試呢間，一食之後其他拉麵都滿足唔到我！佢嘅豬骨湯底濃郁到，你擺匙羹上去係會浮喺面沉唔到落底！個湯頭正到你覺得好似放咗成隻豬入口咁！加上麵質夠幼，掛湯一流！完全係將九州拉麵嘅特質發揮到極致！轉左去灣仔度做都成日專登走過來食碗拉麵，慰勞自己一日嘅辛酸！當全世界都走去食一蘭，我就好開心將別天神當係自己私家飯堂！開心又食唔開心又食～一個月起碼食3-4次！但漸漸由佢開尖沙咀分店一刻開始，質素開始大不如前，而家嘅湯底好一般，同以前嘅水平完全唔係同一個層次⋯作為幾年嘅忠實fans每次你都期望佢返返去以前嘅水平⋯但每次食完都好失望⋯我上來寫食評，希望店主見到檢討翻食物既質素，做得返以前嘅水平⋯