成記牛什粉麵

营业中

休息中

辛苦工作了一天，晚上9點幾先搵飯食，喺新蒲崗，唔係咁熟，盲摸摸，唔知食咩好，但見已經9點幾，實在唔可以食太多，離遠見到有間舊式粥店，行快兩步走埋去，點知收舖中，失望之極向前行，點知....行兩步，就傳來一股牛腩麵的香味，好濃好香，心諗係你喇，竟然向前望好幾間舖都未見麵店就聞到，堅！果然行多幾間店就見到成記，一間舊式麵店，好吸引我呢類喜歡老味道嘅人，入去，雖然枱唔多，都有幾張，但估唔到9點幾，都坐滿。立即點左個牛腩撈，走蠔油。麵嚟喇，果然無令我失望。湯夠味，生麵夠爽，呢點對對一個撈麵嚟講真係好重要。而牛腩呢，佢唔係超"淋"嗰隻，但佢用薄切彌補左，加上逆紋切，令到好易入口。但環境就真係好似樓下街坊小店一樣，喜歡老味道的自會唔介意，若有過高期望，就恐怕要失望而回了。其實這點我之前未嚟過，但上返openrice睇，原來已有咁多人讚，佢牆身仲貼住一些介紹，特別介紹牛丸，見到其他客人有叫粉麵之餘，再加一碗牛丸，差啲令我心動叫埋一份，下次要試下先，始終咁夜，唔敢食咁多。食飽，滿足，回家去也。