去完九龍城泰國雜貨舖買餸，下晝三四點見肚餓，就周圍搵野食。行到侯王道，見到有幾個家長同佢地既小朋友等呢間串燒，就中左入去買幾串串燒頂肚。店裏店外都有木牌寫住串燒名同價錢，大部分都係十幾蚊一串。
廚房係半開放式，可以見到師傅用炭起爐。師傅好認真地睇住火爐燒，平均地烘熟食物既兩邊，唔會令串燒燒燶。燒到最後，塗上蜜汁，令串燒入味啲。初頭以為舖頭係立食，原來係有吧櫈坐，咁等串燒既時候都等得舒服啲。
左: 沙嗲串燒雞肉 ($18) 右: 沙嗲串燒雞腎 ($18) 呢度既沙嗲醬係精粹，夠香夠多汁，味道甜甜地，而且有好多花生碎。雞肉都醃得入味，而且肉質唔鞋; 雞腎爽口得黎唔會太硬，不錯。
左至右: 蜜汁串燒秋葵 ($14); 近江和牛串 ($48); A5近江牛柳 ($68); 特製燒鱔柳 ($58); 炭燒豬頸肉 ($18) 呢一盤串燒比上一盤較惹味，因為灑左少少辣椒粉係面。燒秋葵擺盤幾靚，紅紅綠綠咁。味道方面，辣得黎之餘，有甜甜的蜜汁中和辣味，食返啲新鮮既蔬菜可一解肉膩。
近江和牛串同A5近江牛柳味道相約，牛柳則肉汁較多，可惜牛串未完全解凍，食唔出和牛味，而且有點韌。
特製燒鱔柳燒得最出色，正宗皮脆肉嫩，加上無骨肉厚，又無泥腥味，好食！
炭燒豬頸肉係我最愛的一串，以蜜汁燒，甜甜地得黎又外層香脆，有少少似叉燒，肉夠薄，油脂適中，非常香口。
烏龍茶同支裝汽水食完辣串燒，點都要飲野解辣。咁啱有推廣活動，讚完佢地個Facebook page送汽水，咁又一餐豐富的下午茶了
