蘑菇湯
飲得出每一啖都係蘑菇，好濃郁好味道！
墨西哥雞翼
應該係即叫即整，因為上枱係熱到放唔到入口🤣
雞翼炸得啱啱好，皮脆，入面仲有雞汁，香辣惹味。
三文魚他他
哩個係menu上面嘅secret dish嚟，有機會係其他野，要問大廚先知當日係乜。
由於自己對他他情有獨鍾，諗都冇諗就order，三文魚大大粒絕不欺場，加埋個醬食落好開胃，會想一件接一件咁食。
慢煮北海道豬
出街真係好怕食豬，一係怕”鞋”二係怕”搔”，不過喺朋友嘅大力推薦下就試下啦。
豬肉非常軟稔，我最怕嘅兩樣野都冇，果然冇介紹錯。
蘭王cream brûlée
哩度嘅cream brûlée分兩個版本，我哋揀咗食蘭王蛋，因為出面應該係食唔到嘅。味道非常特別，比起普通版本更有蛋香，一試難忘。
心太軟
朱古力流心相當成功，軟滑而且濃厚朱古力味，但係成碟最吸精嘅係眼珠咁大粒嘅藍莓，由於唔食莓類怕酸，但係大到忍唔住食咗粒，好甜好好味！
海鹽伯爵茶戚風蛋糕
蛋糕鬆軟，滿滿伯爵茶香，加埋海鹽嘅味道好特別，花瓣用咗食用花，非常揼本，手字仲好靚👍🏻
多謝朋友推介，全程食得出大廚嘅用心，用餐完畢大廚仲有出嚟了解返啲嘢啱唔啱食，細問之下原來大廚係會親力親為購買食材同揀生果，真係非常難得。
環境方面冇影到相，但係就非常闊落舒服，仲有室外地方，方便吸煙人士。
餐廳仲有包場服務，經常都會有生日、結婚等等嘅包場。
