附近幾間都食到冇新意，喺開飯仔發現lee間三姐松記糖水，剛開始唔知仲以為「三姐松記」係假松記，後來Google咗一下發展史，原來「三姐」喺1994年自立門戶，數下手指，都有廿幾年歷史啦～ 既然係老字號，又點可以唔試～
近段時間忽冷忽熱，好容易作病，最啱就係食d暖暖燉品，暖心，補身
每日開舖前，必定做足準備功夫
我哋來得早，只係下晝三點，所以舖頭暫時冇乜食客，但據住喺附近來買外賣嘅街坊太太所講，夜晚先至多人吖！
齋睇嗰咁有歷史嘅招牌，仲以為入面嘅裝修好懷舊，但原來推陳出新嘅唔單止係糖水甜品，仲有裝修～
舖頭lee兩年裝修過，乾淨整潔，小清新嘅style，無論一家大細，三五知己，定係甜蜜愛侶都非常適合。
Lee度d甜品，無論傳統定新派都有，老少咸宜，睇相睇食評都覺得餡料足，份量實惠。不時又有飲食達人推介，就算有選擇困難症嘅朋友，都唔洗擔心～
如飲食達人推介都唔夠，仲有人氣熱賣，集百家之所長
1
就連雪糕口味都唔普通，除咗熱門口味之外，仲有供應商Fruttato嘅幾款特別口味：
- 益力多，出面唔係成日食到啦掛? 本身飲品都越賣越貴
- 蜂蜜牛乳，滋潤嘅代名詞
- 青檸雪葩，清新嘅代名詞
- 薑味雪糕，坊間少有
- 紫薯雪糕，薯迷豈能錯過
今次揀嘅甜品，分別選配咗青檸雪葩 & 薑味雪糕，眞係好期待吖～
首先送上嘅係*芒果腸粉*，晶瑩通透，灑上炒香嘅白芝麻，賣相眞係幾可亂真～ 淋上香濃嘅芒果汁，迫不及待要試食～ 
果肉夠熟，香甜，必須要有返咁上下經驗先可以揀選靚生果作食材！「腸粉皮」夠薄，又滑，忍唔住問下職員到底有咩商業㊙️密
原來佢哋用咗海藻粉同椰汁，有別於坊間其他所使用嘅蒟蒻粉，口感自然零舍不同啦～ 
跟住落來嘅係*法式脆糖燉蛋 配 檸檬青檸雪葩*。Custard喺每日開舖前準備好，雪喺雪櫃備用。當收到客人order，會由雪櫃取出，喺custard表面均勻撒上黃糖，然後用火槍將黃糖燒成脆皮糖衣。
即叫即燒的焦糖燉蛋如何令人不興奮，香脆的焦糖糖衣，配上軟滑的custard 還混合著幼細嘅黑色雲喱拿籽，真叫人回味。
青檸雪葩都唔弱，又fresh又醒神，如果可以再酸d就更好啦！
溫馨提示：法式焦糖燉蛋需於燒起糖衣後的 45分鐘內食用，因為焦糖會自然溶解，放耐咗，脆皮糖衣就會變成一攤糖水。外賣嘅朋友記得要留意啦～
噔噔噔噔～ 壓軸出場嘅就係*朱古力心太軟 配 薑味雪糕*啦～ 心太軟嘅迷人之處，盡在一刀切落去嘅時候，裏面嘅朱古力漿慢慢流出，有如火山熔岩般，慢慢流動。薑味雪糕，坊間本身就少有，雖然唔係個個都接受得到，但如果喜歡嘗試新嘢嘅話，絕對值得一試。雪糕唔會太creamy，細心睇睇，仲可以見到一絲絲嘅薑蓉，但食落去唔會感覺「有渣」就係佢amazing之一。辣度，也比較出，而且會喺口腔停留一段時間，一啖心太軟，一啖雪糕，冰火兩重天，你都咪話唔過癮。
「三姐」仲會不時調整可選雪糕口味，令食客keep住有新鮮感。聽講來緊會推出芒果肉雪糕，市面通常係芒果味雪糕，但可以食到芒果肉嘅雪糕窩！聽到都流口水🤤～ 芒果控咪走寶啦～
唔怕唔識貨，最怕貨比貨。「三姐」大不同，除咗全港只此一間別無分店之外，仲係三哥每日親手新鮮製作嘅用心出品而非連鎖店的流水作業；緊貼都市人口味及潮流變化經常推陳出新而非一成不變的菜單；與時俱進，連外賣都推出和網上外賣平台 & 近年跑出嘅Ubereats合作，在家也可輕鬆等到三哥出品。
「三姐」糖水甜品堅持自家製，真材實料，性價比高，值得食過返尋味。大家記得認住lee嗰註冊商標啦～
