深海池魚
刺身($78)，採用魚腩最肥美既部位，肉質顏色呈鮮嫩粉紅，肉身軟腍，近皮位置肉質結實，兩者結合一齊咀嚼口感豐富，配麵豉醬用鹹食方法幾創新，但確實都幾夾。
赤貝
刺身($58)，超爽口，每咬一口都有“索索”聲感覺，唔捨得一口食晒，慢慢逐少逐少細味。
磯燒帆立貝($68)，先食淨食帆立貝一少口，肉質鮮甜而且炙燒過帶點焦香，跟住再用紫菜包住食，真正外脆內軟既感覺，加上調製過既辣粉，辣度適中唔會太淡冇辣味，亦唔會太強搶過帆立貝既鮮味。
左口魚邊
壽司($96)，魚既油脂含量非常高，入口有溶化既感覺，非常肥美，木魚碎有中和作用。
蟹膏豆腐($48)，細細粒一口一粒，濃郁既蟹膏味在口腔徘徊，豆腐同樣係炙燒過帶焦香。
花錦魚生丼($188)，一碗丼飯已經用上左13款材料，全部切成絲或粒狀，所以係攪拌後進食，咁就每一啖都幾乎可以食晒咁多款材料。
夢之丼($298)，食哩個丼飯前，店員推介可以先飲一少口橙醋，我覺得有助清除口腔餘韻味道同埋有d醒胃作用，夢之丼用左7款材料，每款材料都光澤證明新鮮上盛，而且魚生都係厚切啖啖肉好肥美，當日牡丹蝦轉左大拖羅，色澤呈鮮粉紅，油脂一入口已經即刻溶化，海膽顏色亦都呈鮮豔，味道清甜無苦澀味。
