鐵板一 (裝修中)

呢期興生酮飲食，做開運動嘅人都會想食多啲蛋白質，但喺香港出街食肉好多都又貴又細份，聽講呢間餐廳好慷慨，份量十分夠，我就黎試試係咪真嘅先！呢度果然好了解人嘅口味，仲有生酮set!呢度memu選擇唔會太多，唔會睇到眼都暈！生酮set係跟沙律，而普通嘅扒set跟咗個黑糖包，好香好夠熱！沙律菜都幾新鮮，加咗少少麻醬之後好開胃！肉眼扒非常之慷慨，有成三大塊咁多！肉眼食落係比較冧身，呢度都唔例外，食落好方便大大啖，十分滿足！呢個生酮set就更加犀利！燒春雞再加半隻龍蝦，放上鐵板真係相當架勢！龍蝦燒得好香，而且肉都唔少。下面嘅燒雞都係大大隻，好厚肉！我地仲叫咗個黑松露醬薯條，呢度嘅薯條真係十分之好食，因為都係新鮮熱辣即炸嘅，配上黑松露醬，減少咗油膩嘅感覺~生酮Set仲包咗甜品或者生果拼盤，呢個tiramisu唔會太過甜，食完覺得好圓滿~