店面呈L形，地方唔算好大，不過座位都闊落舒服。
佢地嘅蠔款都幾多，除左原味嘅生蠔，仲有調味嘅生蠔，同其他唔同煮法嘅蠔菜式。另外，佢地都有串燒、小食同飯麵供應。
是晚有九款黎自日本唔同地方嘅蠔，侍應會介紹唔同嘅蠔口感同味道分別，方便食客揀自己鍾意嘅蠔。
我同朋友就揀左四款唔同嘅蠔試下，頭三隻都係黎自岩手縣，最後一隻就黎自北海道。
広田灣($98) - 哩隻蠔屬於中size，食落幾清甜爽口，海水味都重。
令和之怪物($108) - 哩隻比剛才嘅広田灣更大隻，食落同樣好爽口，海水味再重少少。
小友($128) - 哩隻係四隻生蠔之中最大隻，口感特別爽脆，海水味亦更重。
昆布森($118) - 哩隻生蠔雖然冇小友咁大隻，但佢特別脹卜卜，食落超creamy。
博多甜王草莓威士忌梳打 & 大分酸橘威士忌梳打($68) - 哩度除左清酒同生啤之外，仲有好多款唔同水果口味嘅燒酌同威士忌梳打。我同朋友就各揀左一款威士忌梳打試下，兩款威士忌梳打其實酒味都唔算重，非常易入口，前者草莓甜味出啲，後者就帶酸甜味。
醃帆立貝薄切($128) - 帆立貝切成薄片舨醃製，上面放左少少香草、黑椒同三文魚籽，賣相幾靚，味道鮮甜。
黑豚小排肉($38) - 黑豚肉偏少少肥，食落油香滿滿，邪惡又好食。
雞心($38) - 雞心口感帶少少彈口，但又冇雞腎咁硬。
牛舌($38) - 牛舌妣哩個價錢比我想像中大塊，雖然未算好厚切，但食落都彈口，鹹鹹香香好惹味。
雞脛柳($40) - 食落幾juicy唔會太鞋，醃得亦入味。
蒜片生蠔意大利麵($128) - 意粉都唔細份，夠兩個人share，上面仲有五隻蠔，雖然冇頭先食嘅生蠔咁大隻，不過都非常飽滿，而且咬開入面仲係好juicy，意粉好香蒜味，食落帶少少辣味，幾惹味。
總結，蠔菜式無論係生蠔定熟蠔都冇令人失望，串燒比起同類居酒屋算抵食，有機會都想再試下佢其他調味生蠔。
