打邊爐係常規之選，不過有兩三個話早两日先打完邊爐，想食其他野，甘有人提議不如去廟街大排檔食小炒海鮮，隊下beer ，又可以坐耐d.
甘我地成班就踏入廟街，即見到一間叫德哥火鍋嘅店有好多客人排隊，睇嚟好似好好食甘，好彩呢度唔只係火鍋店，仲有一個首創浩瀚桑拿海上鮮，朋友仔提議不如就試下呢間試吓啦，因為我地一班人係廣東道行左成日，已經好攰喇，再行到油麻地太辛苦，所以臨時改陣食德哥。
見到首創既桑那海鮮餐 HK 388/ 2 位起，我地都好興奮想試！
呢個海鮮餐包羅萬有，唔洗自己諗，幾好，店家話呢個鍋既海鮮全部都取材新鮮活海鮮，保證新鮮，一睇個menu ，嘩，數得出既美味海鮮都榜上有名，包括: 花蛤、流浮山生蠔、海生蝦、鮮帶子、沙巴龍躉、農場雞、花蟹、吊桶仔。
配菜: 冬瓜件、豆卜、鮮冬菇、娃娃菜、烏冬
由於海鮮準備需時，我哋太心急啦，就叫咗前菜同啤酒，係咁多款唔同嘅前菜當中，我最鍾意食就係呢個炸響鈴。
平時呢款小食通常都係打邊爐先至會叫，原來直接食都好酥脆，香脆無比，加上佢哋秘製嘅酸汁，非常醒胃。建議大家試吓。
除咗啤酒之外，我見到其他枱上嘅客人都有啲一支支粉紅色嘅凍飲，所以我哋都叫咗支試下，呢支係由山楂做主材料嘅凍飲，冇酸莓汁咁酸，味道較淡，非常清新，微微的酸酸甜甜好開胃呀！
個盤主菜終於上台啦，佢用錫紙封住，店員話呢一款海鮮既煮法係用蒸同焗熟，以保存新鮮海產佢嘅原汁原味。聽落好有特色。
海鮮焗煮熟後，再加少少特製豉油，就可以直接食用嘞。
食嘅係海鮮原味同佢嘅鮮甜，所以如果材料唔新鮮，就會好容易食得出。佢既然以呢種做法咁有自信，我相信食起黎一定有驚喜。
焗到差唔多，錫紙剪開，一陣海鮮嘅鮮味撲鼻而來！店員添上佢哋秘製嘅醬汁，跟住我哋就可以自由開餐啦！最注目嘅係中間嗰條沙巴龍躉。
各式各樣嘅海鮮，正所謂寶物沉歸底，我地各人各自找尋心中所愛。切開沙巴龍躉同大蝦後，沉底既係流浮山生蠔同帶子。
一路食一路尋寶嘅感覺非常開心。其實有少少似食盆菜，只不過盆菜係以肉類最多，呢個全部都係新鮮嘅海鮮。雪白嘅沙巴龍躉肉非常幼嫩，肉質如絲般順喉。好正！
海蝦亦都非常之大隻同新鮮。蝦頭充滿着新鮮嘅蝦膏。個新鮮程度令人意外！食完一隻又一隻！
對於店家用咗咁多新鮮嘅材料，每位先至388。其實一啲都唔貴，建議大家一起得菜就好博命食，因為海鮮係要火候啱啱好時最好食，如果任佢煲反而會過咗火位。
佢嘅海鮮濃湯底，唔使講大家都可以想像到係集全部海鮮精華所在，簡直甜到入心入肺！
呢個套餐仲包埋烏冬，所以你睇吓我自製左一碗濃湯海鮮烏冬，幾咁吸引！因為呢一個湯底，我連食三碗烏冬。
以我個人來講，呢個套餐係一定夠飽。個精華濃湯實在食得唔好嘥，所以叫多幾個烏冬係常識。
終於明點解呢一個叫做桑那海鮮，原來靚嘅海鮮，係用桑拿焗出嚟先最鮮甜，哈哈。。。。
