和順記 (碧街)

营业中

休息中

星期六12:30去到，附近都係整車房，店面唔起眼，店仔細細，但內有乾坤。一行四人，除左我全部都係叫生炸雞脾飯，我就+$3轉撈丁，沙嗲汁。送到上黎真係比塊雞脾嚇親，係超級大塊。配飯就一碟過，仲有埋隻細煎蛋，撈丁就係雞脾分開上，見到撈丁比平時出去食份量少啲，轉頭你就知點解。望落去塊雞髀睇到炸得非常酥脆，咬落去亦都冇失望，色水都幾靚，雞肉嫩滑多汁好容易撕開，肉醃得入面都好夠味，而出面塊雞皮仍然保持脆身。咁大塊雞脾生炸入面都全熟，都真係唔易，因為有食過一係入面未熟仲有血水，一係炸得太柴，呢塊咁厚都熟又保持到肉汁。唯一係太油，可以乾身啲先上碟。女仔黎講都我都算大食，但就好後悔一啖麵一啖雞脾，因為食到後面根本食唔晒隻脾，同行3位男位都食唔晒。撈丁加$3跟熱飲埋單$51，大件夾抵食，飽到上心口，第二日想翻桌食，點知星期日唔開。下星期諗住試下2:30後下午茶$37生炸脾跟薯條先。