新志記海鮮飯店 (已結業)

早排天氣凍，特別想食幾樣嘢：羊腩煲、打邊爐、煲仔飯，同埋生炒糯米飯。要搵好食的生炒糯米飯其實幾難，唔係炒得太濕，就係冇咩料。太子的「志記海鮮飯店」係正地鐵出口旁，格局係好舊式的街坊飯店，但原來佢的生炒糯米飯係有名的招牌菜。舊式的海鮮飯店有個共通點，就係菜式分量偏多，所以人少的話，就唔好太貪心點咁多。好彩，佢的糯米飯係可以選一碗（$75）同一碟（$120），如果兩個人食一碗，每人都大約分到兩碗。一睇已知飯炒得乾身，唔會黐到一舊舊，飯亦夠味，加上非常足料的臘腸、蝦米等等，質素果然高。生炒骨（$82）係去傳統飯店必叫菜式，其實我仲未分清楚生炒骨同咕嚕肉分別，不過都係聽聞呢度的生炒骨做得好，就即管試下。生炒骨醬汁呈冶艷的橙紅色，唔會過多或過少，配上青椒、菠蘿、洋蔥等等，未食都覺得賣相好吸引。醬汁酸甜適中，骨的粉漿都唔厚，好食。另一種必吃佐酒佐飯菜式當然係椒鹽九肚魚（$80），條條肥大又完整，唔會甩頭甩骨，炸漿薄薄的，外面微脆，裡面仲好嫩滑，火候恰到好處，就只欠支啤酒。食飽飽伙計叔叔仲送左碗綠豆沙，雖然免費，但都煲到起沙，清甜味道可以沖刷下味蕾，非常滿足。