不過今日食飯真係有啲曲折啦，因為全線地鐵停駛，要坐巴士或揸車過嚟，好在路面冇乜大問題如果唔係個生日飯就食唔到啦！
好在佢哋有15人嘅大枱，唔會坐得太迫夾，枱面放上多啲菜都唔會覺得擺唔落，方便大家庭。
前菜四小碟（椒鹽九肚魚、金沙涼瓜魚皮、脆皮燒腩仔、手帕青瓜），但係唔係一齊上晒呢四個前菜，比較奇怪啲。
椒鹽九肚魚好鮮亦炸得鬆脆。
金沙涼瓜魚皮拍得住星加坡鹹蛋魚皮，鹹蛋涼瓜唔會太苦亦唔會太咸，味道中和得幾好。
1
脆皮燒腩仔皮脆肉嫩有水準，個黃芥辣，唔係英式唔係法式芥辣，但配合起嚟好夾。
手帕青瓜水準合格。
叉燒係呢度嘅招牌菜之一，果然有水準好淋好入味又唔會太肥。
上湯龍蝦伊麵有驚喜，龍蝦鮮甜肉嫩，有驚喜嘅係伊麵湯底，我估計佢哋嘅上湯係再加龍蝦殼去煮，所以伊麵食起嚟好有龍蝦味，好香好濃。
鴛鴦胡椒蒸花尾龍躉係呢度嘅特色菜之一，龍躉肉好嫩滑，配合中度辣嘅胡椒，好有層次同好開胃。
金牌片皮鴨皮脆肉香，佢哋嘅鴨唔算肥，但係都好有咬口好有層次。
上湯杞子浸菜遠：估唔到有花膠碎鋪面，菜遠好幼嫩冇渣。
當紅炸子雞亦炸得十分好，個脆皮都有片皮鴨個脆皮咁脆。
瑤柱蛋白炒飯，炸過嘅瑤柱鋪面零瀉香口，炒飯亦都唔錯，只係之前嘅菜碟頭都好大分量去到尾已經有啲唔係好食得落啦！
價錢大約$400一個人，以呢個食物水平都算有唔錯，可以再幫襯。
