瀛喜日本料理 (已結業)

一大班老友話要同我慶祝生日喎，我當然唔會拒絕啦，我就提議食放題，佢地就選擇地點。既然係任食我當然狂叫啦。先食個鍋物shabu shabu先啦，超多塊既肥牛夠晒滑呀，加埋豆腐浸晒牛肉味正喎，最後飲埋個昆布湯底就夠晒甜啦。班老友急不及待就叫左一大盤刺身拼盤，排放整齊有心思，多款魚類刺身夠晒新鮮呀，尤其係吞拿魚又夠滑又夠脂肪味道。仲有一大板海膽，夾埋紫菜黎食真係無得輸夠晒鮮甜。旁邊仲有牡丹蝦刺身爽滑真係食到無停口。 接住落黎係食特色壽司，黑松露三文魚壽司高貴得黎又能突顯黑松露獨有味道，柚子蟹柳夠晒份量，柚子既酸配合蟹柳既甜別有一番味道。最後食左d熟野例如秋刀魚，因為時令食品，簡單用鹽燒已經相當好食，秋刀魚外滑裡爽，肉質甜美，配合鹽燒味道確有著秋意。