Isaac Toast (朗豪坊) (已結業)

想食呢間吐司過江龍好耐啦，係近期去開朗豪坊終於有機會一試，平時少去沙田所以去旺角就把握機會啦！名氣都幾大，今次就試試佢質素高唔高先。旺角店係以food court形式經營，點餐後就搵位坐底等餐啦。Food court有唔同種類嘅食物，所以今次只點咗個吐司淺嚐吓。香脆薯餅吐司吐司有好多款式同口味，今次就試款比較少係其他國家吐司見到嘅薯餅口味。攞上手都好重手，分層好清楚，兩片厚度適中被蜜糖抹過嘅吐司，蛋同芝士都各一片，加埋香脆薯餅，簡單但能夠帶來滿足～吐司金黃色帶甜味，芝士半融狀態同薯餅融為一體，薯餅邊位脆身令吐司嘅口感提升咗！而中間位置正常都會變軟，薯肉部分唔會被芝士味蓋過，依然有存在感。工整嘅蛋層仲有粟米加咗入去，唔會太dry！內裡用嘅醬汁份量都頗多，帶mustard味幾過癮。整體嚟講一份吐司都相當大份同飽肚，用料實在，即叫即製夠熱燙，雖然叫價$30左右，但品嚐到異國滋味亦值得的！