幸福駅 (已結業)

玉子今日去咗深水埗行街買電腦，然後最近見Facebook推薦呢一間玉子燒，所以專程嚟試吓。呢間玉子燒嘅位置唔算好易搵，同黃金商場有啲距離，佢係位於嘉頓嘅斜對面，係一間涼茶舖隔離，要細心啲先搵到。我地點左一個櫻花蝦玉子燒，呢度嘅玉子燒口味偏甜，蛋嘅質感都非常嫩滑，加上櫻花蝦乾乾地身，有兩種唔同嘅口感，唔錯。另外我帶咗一個豬扒包，呢度嘅豬扒包用紙包好，方便外賣拎走慢慢食。一打開見到好後嘅豬扒，好吸引。豬扒唔會炸到好乾，食落口感鬆化。飲品方面，呢度唔係賣珍珠奶茶，而係賣冷泡茶同冷泡咖啡，我就對冷泡咖啡興趣不大，但男朋友就叫黎試，佢就話唔錯。