36
連加一二百頭就有嘅火鍋放題，環境Cosy，甜品、小食款式都幾精彩，例如Tiramisu 、碗仔翅、砵仔糕、Pancake、雪糕、雞蛋仔之類。喺Melbourne 酒店自助早餐見過嘅Pancake機同呢度同款，連texture都一樣。
火鍋湯底大路同養生都有，醉雞鍋都幾香酒味。火鍋料係貴精不貴多，但想食嘅有就得：鮮蝦、沙白、魷魚、牛柏葉、脆骨腩、脆鯇片、墨魚滑、韮菜餃、豬皮、豚肉片、羊肉片、肥牛呢啲，樣樣都好食，唔係得個樣無味嘅料。個人魷魚食法係攞自取區嘅咖喱撈埋食，因為佢個咖喱辣辣地又有香料味，好地道超正。韮菜餃好香，韮菜控嘅我食左6粒咁多。脆鯇係真正脆鯇厚肉實淨爽脆。呢度仲食到好耐無食過真正有牛味唔韌嘅肥牛。
甜品仲有豆腐花、奶凍、啫哩糖、Brownie、涼粉、糯米糍、果凍、限量梳乎里、各類雪糕、飲品等等，而且開到凌晨2點嘅食肆真係買少見少，同朋友當食甜品buffet都抵。
