燕樂居糖水店 (已結業)

係電氣道食完晚飯, 知道朋友係芋頭迷, 就話佢知電氣道有間糖水鋪有芋頭酥食, 佢聽到就決定要去食除左芋頭酥, 我點左六月飄雪, 朋友點左蘆薈豆腐花加雪糕芋頭酥岩岩炸起, 熱辣辣, 攤左一陣食都仲好熱芋頭唔會一pat野但係又好滑, 岩岩好, 加左少少蛋黃, 更加香口, 正!!六月飄雪係椰汁底, 有綠茶涼粉同水晶珠, 再係頂加個雪糕, 我揀左香芋味。椰汁底唔太甜唔太漏, 涼粉爽口, 水晶珠一咬即爆, 好過癮, 唯一唔好係唔太凍, 要個雪糕溶左落d椰汁度先凍d..不過都好好食, 都幾飽下朋友o既蘆薈豆腐花都係加香芋雪糕, 要加$5, 個人認為唔抵, 不過佢勁想食就另當別論。試左一啖豆腐花, 好香豆味, 好滑, 蘆薈用蜜糖浸過, 我認為浸過龍, 有點兒過甜, 不過都接受到而且朋友認為冇問題。佢個汁底白色o既, 好似係豆漿呀! 不過唔太肯定今晚唔知點解冇乜人...慢慢食完坐左陣先走...芋頭酥$12, 六月飄雪$18, 蘆薈豆腐花$18 雪糕另加$5ps. 香芋迷朋友提起先知, 原來市面上o既香芋雪糕已經幾乎絕跡, 只剩6支裝o既香芋脆皮樂雪條, 所以呢度有香芋雪糕真係好驚喜, 好罕有咁話。