北海道爐端燒 (已結業)

出糧日又可以食好啲，就貢咗上嚟呢度，叫咗燒牛舌，魚生丼，炸雞。呢度環境清幽，光暗度感覺有氣氛，坐得尚算舒服，可以靜靜哋傾下計。魚生丼，每件都係大件厚切。而且多種類，我覺得最正都係金目鯛，爽口彈牙，其次就係肥美三文魚腩同劍魚腩，再者飯中已混入醬油，仲有好多玉子條，豐盛到一個點，仲有我想講呢度嘅芥末似係即磨個隻，食出經典原味。燒牛舌，大件嘅，厚薄適中，火喉啱啱好，其實送緊上枱時都已經聞到好香，肉汁保存無流失，肉質嫩滑易吞，兩口一件，有水準。最後開心share招牌香酥雞件。雞件係即炸嘅，果然香酥撲鼻，肉質亦都鮮嫩juicy。配合相信係自家特製嘅醬汁，味道的確迎合到我。今餐價錢合理環境優美，令我地都幾滿意。