新泰東南亞餐廳 (已結業)

今日返灣仔舊公司搵舊同事拎嘢，順便聚下舊，舊同事好喜歡食泰國菜，佢話不如去新泰食！因個環境好舒服！平時去開食泰菜，都會叫柚子大蝦沙律，但今晚轉咗食泰國青芒果沙律，好清新，爽口，小小酸，小小辣，極醒胃！泰式炒椰菜仔，椰菜苗好清甜丶廚師還將椰菜苗一開二或三，細細啖，容易食！叻沙蝦米缐，椰汁味香濃，蝦又大隻新鮮，芽菜又多，啱我口味，正！泰式青咖喱雞肉配印度酥餅，係天作之合！青咖喱雞肉滑身，有好多件雞件！印度酥餅夠脆口，配上青咖喱汁食，好味道到冇朋友呀！就算印度酥餅不配青咖喱汁食，單食都好好味！好脆口，十個正！配白飯亦都係絕配！餐廳內的服務人員個個都是泰國人，入到去有置身係泰國嘅感覺！真心要介紹比其他老友，咁下次要約多啲朋友一齊食，可以食多啲不同小菜