Backyard (已結業)

今日咁岩喺荃灣做野收工於是乎就約個住喺荃灣既朋友仔食飯啦。咁岩我又就生日所以就當食埋個生日飯，佢發辦帶我去食好野。帶左我去中染大廈既backyard,離地鐵都係幾分鐘路程。餐廳設計走歐美風而且樓底非常高，空間咁十足。我地兩個人叫左一個all day breakfast一個意粉同一個甜品。點完野食，好快就上餐湯同餐包蘑菇忌廉湯，質地幼滑蘑菇味濃，而且湯入面仲粒粒既蘑菇碎，口感十足。餐包軟硬適中，配上意大利黑醋酸酸甜甜，非常開胃。海蝦意粉配香辣車厘茄忌廉汁，意粉煮既時間剛剛好，口感煙韌。忌廉汁微辣惹味配上車厘茄既鮮甜增加左味道既層次，海蝦兩邊煎香，肉質爽口彈牙，鮮甜蝦味濃。All day breakfast 跟配既粉紅色三治賣相夠特別，食落原來係紅菜頭三文治，紅菜頭味香帶淡淡既甜，而且兩邊都有烘過非常香口。薯餅新鮮即炸，黑松露炒蛋黑松露份量多味道夠香濃。炒什菇同樣出色牛油炒得夠香口。甜品窩夫串串配三色醬，窩夫焗得鬆軟蛋味濃郁，切成一小舊用竹籤串起方便食，三色醬各有特色，朱古力夠香濃，楓糖甜而不膩，士多啤梨醬清新可口。一款甜品有三種味覺享受。