好日咖啡店 (已結業)

好耐冇黎葵興，原來呢度有個咁方便嘅新商場，地鐵站直接有天橋可以嚟到，全幢都好多嘢食。咖啡店環境幾好，光線充足，如果一至兩個人嚟可以坐近窗，三人以上就唯有坐返中間。餐廳食物選擇不多不少，飲品四五十蚊一杯，正常咖啡店水平，因為都預咗你會坐得耐，但呢度要主動問侍應先會俾水同埋加水。我知道咖啡店靠賣飲品賺錢，但我冇可能坐兩個鐘嗌五杯咖啡，而且已經有每人最低消費，唔驚啲人唔嗌嘢飲，所以餐廳最好主動俾水，或者有個自助枱俾人自己加水。食物方面，嗌咗一個有花生醬既漢堡。漢堡扒唔算乾，但亦都唔算好多肉汁。花生醬幾好味，唔會好膩，整體ok。意粉黑椒味超辣，我食咗一啖已經再食唔到。之前有睇OpenRice，有人推介嗌特濃朱古力，鍾意朱古力味嘅我就跟，但所謂嘅特濃都唔算好濃，同茶餐廳係濃少少，但同真係濃嘅咖啡店比就好一般，有啲失望。總括來講，呢度環境唔錯，但係服務同食物都仲有好大進步空間。