Zakka (已結業)

約咗好耐無見嘅朋友食晏，朋友提議到銅鑼灣翡翠明珠廣場，因為有幾間餐廳可以選擇，位置又近港鐵站。而我驚食晏時間多人，所以12：30就上去行一圈，最後決定揀一間從未食過嘅Zakka，因為見到入面嘅環境比較適合傾偈。仲有見到餐牌嘅午餐套餐都只係$78，無加一，可以一試。於是我哋排隊叫咗個“三文魚日蛋蓋飯+是日蕃茄餐湯+熱檸水”及“漢堡蛋薯條松露醬+是日蕃茄餐湯+熱奶茶”，合共$156可以用信用卡或八達通，非常方便！好似快餐店咁，可以於自助餐車度攞餐具同冷熱水等。總結：食物水準一般，賣相就唔錯，三文魚蛋蓋飯，有啲鹹，搞到我要飲好多水，而我哋覺得最好味嘅係蕃茄餐湯，最後食完就覺得價錢唔算抵，難怪午餐時間都唔多人食，如果想同朋友係銅鑼灣食晏時間傾下偈，呢間就真係唔錯嘅選擇啦，因為唔多人等位，可以坐好耐。