泰掂菜館 (已結業)

今晚又去九龍城食泰國菜，揀間未食過嘅。呢間叫「泰掂」嘅餐廳環境乾淨企理，細細間但樓底好高空間感十足！一入到去店員就好親切就招呼我哋。【招牌冬蔭功（S）】首先嚟嘅係冬蔭功，叫咗個S都幾大碗喎，兩個人食夠晒，每人飲到兩碗。個湯好香椰奶味，酸辣味平衡，唔算太辣，開邊蝦好大隻好彈牙，飲完個冬蔭功真係好開胃！【泰式串燒 豬/雞 各3串】串燒即叫即燒，上到枱仲聞到灰燒嘅香味，燒到金黃色微焦，雞肉外脆內嫩，比較Juicy，豬肉較有咬口亦唔韌，配埋個沙爹醬好惹味！【咖哩海鮮包】嘩！兩個麵包大大個，淋滿咖哩汁。中空嘅麵包入面有勁多海鮮，有蝦、青口、魷魚，仲有南瓜等，超級豐富！煙韌嘅麵包索晒啲咖喱汁好正。食完呢個真係唔駛再食飯麵，好食又飽肚之選！呢間泰國菜食物非常有水準，分量亦好足，兩個人食咗三樣嘢已經好飽。另外，環境舒適乾淨，食得寧舍relax，嘆埋啤酒邊食邊傾計，又一個愉快嘅晚上。