大廈入口有少少隱蔽，位於郵局門口隔離，福源廣場對面，係有少少難搵。
lunch 喺度食飯唔算多人，餐廳一般只有兩個職員，所以出菜唔算好快，想確保有位置可以事先打電話預約，但我試過兩次都冇人聽可能人手唔夠。
今次同一個同事上嚟食嘢，一人叫咗一個set ，黑啤燴牛肉、薯蓉、法包，仲有香煎鱈魚、辣肉腸燴法式雜菜，跟果茶。
黑啤燴牛肉、薯蓉、法包
牛肉選用牛腩，黑啤味唔算好濃郁，薯蓉味道有驚喜，似乎加咗芝士喺入邊，感覺比夠有黏度，牛腩要點埋個薯蓉食會更正，但法包稍為腍左啲…
香煎鱈魚、辣肉腸燴法式雜菜
鱈魚煎得夠香嘅，同雜菜都夾，但魚肉麻麻地一夾就散，要喺隻碟嗰度慢慢搵番啲魚肉，尷尬… 賣相幾好睇嘅，睇到廚師細心擺過先出菜。
呢度會另收加一服務費，老老實實，性價比唔高，品質唔算出色，但環境舒服，喺荔枝角平日想舒舒服服食個午餐可以黎試試。
