滿屋廚房 (已結業)

星期五晚因爲同我細女提早慶祝生日，一家出左去8咪半食飯，食完之後我老公話要同細女食個cake 當生日蛋糕，咁近近地行去愉景新城去睇下邊度有得食。咁我哋行吓行吓就見到fullhouse 啦，佢嘅裝修真係好吸引小朋友嘅目光，好童真嘅佈置。鋪頭嘅門口有個蛋糕櫃，放着一件件好精緻嘅蛋糕仔，老公都比呢啲蛋糕吸引着，所以就決定一家人一齊入去食件cake啦。每一個小朋友都揀自己鍾意食嘅蛋糕我哋諗住咁樣會平過買一個大蛋糕，又怕一個大蛋糕食唔晒會浪費。我叫左個栗子蛋糕，我本人就好鐘意食栗子蛋糕嘅，但呢度嘅好似得個甜字，唔夠栗子香味，面頭個半粒栗子都只係得比糖水浸過甜味。特濃朱古力蛋糕：算係不錯，幾香，朱古力味都夠。豆腐意大利芝士蛋糕：豆腐同芝士味都不太夠。青檸熱情果慕絲餅：好大陣洗潔精味.....我三個女最後都唔肯食....青蘋果慕絲餅：青蘋果味係香精味，但冇個熱情果咁難食。呢度嘅咸食係好味嘅，但蛋糕就唔多好了。