㗎仔飯 (已結業)

經過旺角本身都無諗住食飯，但眼尾見到有間日式便當既吉列豬扒好似好正，再仔細睇下個餐牌，有我去親日本必食的可樂餅，無理由路過唔幫襯既。下午6點前落單仲有9折, 我剛好5:55PM 落單。落左單之後都等左一陣先整好比我，睇尼個可樂餅係現炸既，咁我當然樂意等。終於有飯食啦，咖哩汁會分開上而可樂餅淋滿左沙律醬。可樂餅炸到脆卜卜好好味，沙律醬略嫌多左，下次我係醒目走醬。鍾意食飯撈汁既我尼講，啲咖哩汁係剛好夠撈飯，仲有紅蘿蔔及薯仔各一舊，煮到好稔好好味。跟飯既熱茶都係比較細杯，但我慣左自己帶水出街，咁咪飲返自己啲水囉。餐廳主要做外賣，堂食位置約6個。餐廳內有好多可愛的公仔，可以一邊食飯一邊欣賞下。聽到店員話門口玻璃門既畫係經常會轉既，有興趣可以留意下。