玉桃軒酒家 (鱷魚恤中心)

营业中

休息中

星期3晚去咗呢間酒樓食Dinner，雖然係工作日，但幾乎爆滿，好彩我哋提早預約。餐廳裝修以白色為主調，再帶點紅色嘅裝飾，頂頭有好多水晶燈，幾雅緻，感覺幾高級。一入門就見到好多枱都叫咗冬瓜盅，賣相真係幾吸引，不過因為我哋下午啱啱食咗冬瓜鴨湯飯，所以今次冇試，下次再嚟試下。翡翠花姿珊瑚蚌翠綠嘅蔬菜襯托住啲珊瑚蚌同魷魚，睇落好清新。珊瑚蚌同魷魚都係口感好爽彈，咬落去帶自然嘅鮮甜味，配埋清脆嘅四季豆一齊食，好清新，不過份濃味，幾舒服健康嘅感覺。上湯焗波士頓龍蝦主菜我哋揀咗呢個上湯焗波士頓龍蝦，有套餐配埋個黃金蝦球，價錢好抵食。龍蝦肉質鮮甜彈牙，上湯嘅味道啱啱好，唔會搶晒龍蝦嘅風頭，反而襯托到佢嘅鮮味，加埋伊麵，冇浪費到啲上湯汁。至於黃金蝦球，就炸得金黃香脆，入面嘅蝦肉鮮甜又嫩滑，外脆內嫩，而且鹹蛋黃味都幾濃郁。