桔梗 (已結業)

呢間聽聞係來自台灣嘅小店，地方真係幾寬敞。唔止地下個層夠大，上面仲有兩層。最得意係見到menu係可以叫水煙，不過價錢關係我就無興趣試了。餐廳入面有廁所呢點幾好，但清潔度有待改善。-海底世界（海龍王真的來了）呢碟主要有奶油龍蝦、帶子、羅勒堅果醬、溫泉蛋同貓魚等食材。龍蝦唔算太大，但肉質尚算彈牙鮮香。帶子肉質亦厚身，煎得外脆內軟。燴飯唔會過份油潤，保留到清新感。-番茄培根松板豬燉飯松板豬幾大塊，不過有點難咬開。焦香入味，但未夠鬆軟。燴飯相對重口味，蕃茄醬汁十分濃郁，酸度刺激醒胃。溫泉蛋煮得幾出色，蛋香嫩滑。欣賞呢兩款燴飯都有炸藜麥，口感同味道都好特別，同香口小食無異。-炸蟹餅有啲失望，蟹肉較韌，鮮味不足。不過伴碟嘅沙律醬酸爽開胃，蕃茄肉清甜。-特製雞中翼雞翼份量比想像中多，但等候時間最長，所有菜式食完先送到。幾入味，香口中帶微辛，配上稠身蛋黃醬中和油膩。-桔梗奶昔面層有甜中帶蜜味嘅輕盈忌廉，我幾鍾意單食，因撈勻飲品後會飲唔返隻味。以奶昔而言，味道頗清新，有淡淡香蕉味，偶爾幾粒嘅花生碎為飲品增加果仁香及嚼感。