香港大牌檔 (已結業)

兩張猛男滾死隊coupon，自然不會同老婆去睇，呢ｄ戲，都係一班麻甩佬去睇最開心。吹雞睇戲，有幾個同事都有興趣，凸頭人數，就補買飛，除番勻，價錢還可以接受。最近的只有銅鑼灣總統戲院有做，中午就先去買飛。事後呢套真係堅垃圾，唔怪得無戲院做啦。回程到左香港大牌檔午餐，上一次唔知有垃圾蟲係樓上，今次醒水，特地上去望下，還以為可以一齊合照，但原來只可遠觀也。叫了個椒鹽肉排飯，連例湯和熱飲，午餐價錢款款不同，賣的是翠華價錢。例湯無味精，雖然是有點淡，但還是可以接受。椒鹽肉排飯只有幾塊肉排，和真正大牌檔相比，明顯細碟了，當然你可以話佢送左幾條菜心俾你，依家菜比肉貴，差不多了。可惜椒鹽味不重，就連鼓油汁都很少，所以，最後都變成「乾梗」白飯了。熱奶茶也是中規中矩，感覺少了點滑度，而且有點苦澀，看來還大有進步空間。這裡的午餐，價錢不便宜，味道沒特別，還是可免則免。