鬼混 (已搬遷) 新店位置

同朋友銅鑼灣行完街，想搵個地方抖下又食啲野，喺附近見到有間環境唔錯嘅餐廳叫鬼混，位置喺銅鑼灣嘅糖街，見價錢都唔算太貴就入去試吓。周圍嘅裝飾佈置都充滿一種復古同恐怖感，而餐廳入面嘅裝修都做得十分優雅，感覺似去左萬聖節鬼屋咁。山楂玫瑰薑茶☕️茶壺同茶杯都好精緻，份量都算唔少，味道幾夠濃味，比較重山楂味同薑味，入口十分甘甜而開胃。藥膳冬蔭公🥣同平時嘅冬蔭公味道有啲差別，呢度嘅冬陰公唔係平時嘅辣同重蝦味，反而飲落係比較重藥材味。水牛芝士氣球沙律🎈以影相打卡嚟講，呢道菜一定要點，以氣球伴住沙律都係第一次見，而且沙律嘅配料都幾豐富同多款式，唯獨個氣球係無乜味，為裝飾為主。炸蕃薯條配海苔粉🍟暫時叫左呢幾樣覺得最抵食，份量夠，炸得通透而唔係油淋淋，而佢本身無醬汁伴隨，如果齋食會有d乾。純素乳酪咖喱椰菜花🥦特別嘅椰菜花食法，上碟時竟至以為上錯菜，因為菜式做法係將椰菜花壓成扒狀咁上碟，並將表面油炸，唔講以為係一塊魚扒，食落相當有新鮮感，味道又唔算太濃。