樓下冰室 (已結業)

有個朋友住喺呢間冰室上面，嗰日去完佢屋企聚會之後，就一齊去咗呢間冰室食晚飯。佢之前已經試過，佢特意推介我試吓佢嘅番茄湯，因為佢嘅番茄湯係冇添加味精，而且味道比較清淡，啱晒啲唔鍾意重口味朋友。成間餐廳嘅裝修都好懷舊，入到去座位都好闊落，環境感覺幾舒服！由於我嘅朋友推介我試下個番茄湯通粉，我地叫左一個瑞士雞髀配嫩滑炒蛋番茄湯通粉，價錢（$48）亦都好合理。瑞士雞髀大大隻，而且入晒味，入味得來又唔會太咸。雞髀既肉質嫩滑，而且包住晒啲肉汁，加埋啲碟邊既瑞士汁，非常juicy！番茄湯食落去感覺好天然，唔似加左味精，而且有好多番茄肉喺裏面，加埋滑嘟嘟嘅炒蛋，非常之夾！如果跟餐叫埋嘢飲都只係飲品嘅半價，不過如果鍾意番茄湯嘅朋友，飲佢個湯都唔使再叫野飲，因為飲完唔會口渴，想慳返杯野飲錢都仲得！至於朋友就試咗佢個冰室炒意粉（$50），佢有別於一般嘅茄汁炒意粉，因為佢加左好多蒜，加埋茄汁一齊炒，真係好惹味！加埋蕃茄蓉一齊炒，真係好食過普通茄汁燴意粉！