韓半島 (已結業)

韓式嘅食肆而家成行成市，開到成街都係，都已經真係好難去搵到一啲值得去試又係好食嘅韓國餐廳。不過今次黎到韓半島，就好似見到一片綠洲 ，因為佢終於唔係得炸雞啊水冷麵啊同埋部隊鍋嗰啲。環境都算唔錯，幾闊落，無論係同一班朋友仔食飯，定係同男朋友撐枱腳都係一個唔錯嘅選擇。食物方面，原來有好多款都係依據韓國嘅一啲地形、習俗、人或者動物而去創作嘅， 大廚真係好有諗頭啊！就例如呢個五花腩肉忌廉意粉咁，佢就係仿照漢拏生態林嘅下雪天。意粉搭乘一個高聳嘅小山，真係幾得意喎！呢個意粉聞落已經好香，忌廉汁好thick好香濃，滑溜嘅奶油香會令你好想一口接着一口，加埋現場刨落去嘅芝士，將芝士同忌廉嘅味道完美結合，滿咀都係忌廉香。五花腩肉如果在肥少少就好啦，不過份量都算係好多，真係唔錯。另一個主菜叫閑麗水道的斑斕。其實就係牛肉飯團。佢嘅賣相好得意，係由三座唔同大細唔同高度嘅圓柱體飯團組成，裏面仲有飛魚子、鯷魚乾，食到牛肉嘅鮮味之餘，仲有好豐富嘅口感。我最鍾意就係佢嘅飯好chewy，係彈牙嗰種，加埋脆身嘅海苔一齊食，感覺好得意架！最後就係海鮮薯仔煎餅。泡菜煎餅平時喺韓國餐廳就食得多，但煙煙韌韌嘅薯仔煎餅都真係第一次試。