皇茶 (已結業)

食完飯，想同朋友去坐低飲杯野，夜麻麻我當然想飲啤酒啦，但係朋友就話佢唔想飲酒，佢話有個地方又有得飲啤酒，又有得飲珍珠奶茶，又或者你想飲水果茶都得，於是佢就帶我嚟咗呢一間茶飲店。呢間Royaltea by tea circle位於廣華醫院嘅斜對面，平時就算喺旺角行街，都比較少嚟到呢個位置，所以之前一直都未試過呢一間茶飲店。呢度雖然貌似主打珍珠奶茶水果茶等等，但其實都有特色嘅啤酒提供，而且店舖有少量嘅座位，等我哋嗌完啤酒飲品之後都可以坐低慢慢飲。我就帶咗一杯鹹檸啤，係啤酒入邊加入左鹹青檸，坦白講飲之前都有少少擔心唔知係咩味架，但原來感覺幾好幾清新，而且價錢一啲都唔貴，如果咁啱幾個朋友有啲想飲酒有啲唔想飲酒，呢度都係一個幾好嘅選擇。