麵之神車仔麵 (已結業)

星期日例牌一早起身做家務，差唔多午餐時間，家人就提議食車仔麵，講得車仔麵就通常會叫麵之神。元朗車仔麵都算多選擇，而麵之神的特別之處，一來係食材較為日式，有日本鰹魚雞湯底選擇，二來係食材都煮得好入味，三來係食材份量及選擇豐富。家人叫咗港式九大簋雜錦麵，配日本葛絲及沙嗲汁，除咗食材豐富外，豬紅及蘿蔔都十分入味，好食！我叫咗招牌大雜麵，配米粉及沙嗲汁，咖哩魚蛋入味，牛肋條大件又夠淋，豬皮，魷魚，油揚都唔錯。