酒鍋 (天文臺道) (已結業)

一直都好想試吓尖沙咀嘅酒鍋，火鍋店佔全層，而且位於一棟新型嘅商業大廈上面，好容易就搵到。餐廳環境裝修以紅黑色為主，富有神秘嘅感覺，而且枱椅以木為主，仲有室外嘅露台可以比客人抖抖氣。湯底-五國美人，有五個唔同嘅湯底，當中我最鍾意冬天至啱食嘅羊腩湯底，飲一啖湯底好暖胃，而且非常濃郁嘅羊味道，好正。火鍋必備嘅牛魔王拼盤賣相非常吸引，而且當中有不同款式嘅牛肉，包括有牛柳粒同埋雪花肥牛等等，牛肉非常新鮮，食落去有好鬆軟嘅口感。除此之外，羊肉都係餐廳嘅招牌菜，頂級蒙古涮羊片非常大片，而且肉嘅條紋係半肥瘦的，食落去羊肉嘅質感煙靭，一啲都唔騷。另外鴨血、即炸響鈴卷、各款嘅餃🥟類、蔬菜同埋丸類等等嘅火鍋配料，同樣地非常新鮮，非常好味。飲品方面，仲有自家製嘅竹蓆水等嘅涼茶提供，勝在裝飲品嘅器皿好似一個燈泡💡，賣相非常特別有趣。難怪晚市時間已經全場爆滿，座無虛席，而且火鍋款式特別，食物配料新鮮，屬於高質素嘅火鍋店。