Siam 28 (中國保險大廈) (已結業)

今日朋友帶我去呢度食泰北菜，之前都未食過，原係咁好食。炸青木瓜沙律配自家醬汁，新鮮木瓜沙律食得多，炸木瓜沙律都係第1次食，d木瓜絲每條都炸到脆卜卜，配埋佢地特制嘅醬汁，酸酸辣辣勁開胃，個醬汁入面仲有大蝦，勁足料。泰北牛腩湯，冬蔭公成日都飲，今次就試吓泰北湯，飲落好清，都有酸辣嘅味道，好好味，個湯仲有大量嘅牛腩同草菇，d牛腩煮到啱啱好，食落唔太淋唔太韌，勁正。泰式濕炒海鮮停頓之麵，個賣相非常靚，d麵竟然可以凌空企喺度，我都係第1次見，d炸麵好鬆脆，側邊d海鮮味道好好，有大蝦，蜆同魷魚，好新鮮，d麵撈埋d汁一齊食，好好味。泰式薑奶茶，個奶茶好濃郁，入面仲有2塊大薑片，飲落勁暖胃，原來奶茶mix薑係咁夾。蜂蜜香茅茶，香茅茶勁香香茅味，煮到出晒味，呢度d蜜糖係另上，自己鍾意幾甜就自己控制，香芽mix蜜糖嘅味道又真係唔錯。