有囍 (已結業)

今日到花墟逛街，行到咁上下又到食飯時間，咁就喺附近揾咗間叫《有囍》嘅小館試吓。食肆面積唔細，裝修風格新穎别緻，多姿多彩得嚟有啲格調，座位都算闊落舒適。睇下餐牌，原來呢度唔止有中式小炒，仲有好多星、馬特色小菜， 咁就啱晒鍾意試新口味嘅我。天口咁熱想食的惹味嘢，先叫個星加坡金沙炸魚皮($68)，大大塊金黄色真係好吸引，入口卜卜脆，又有濃郁嘅牛油同鹹蛋黄香味，真係忍唔住口，食完一塊又一塊。星加坡麥皮蝦 ($198)，睇個名好特別，所以專登叫嚟試吓。原來以入口馬來西亞嘅麥皮，加啲牛油入去炒，做到金黄酥香，配埋炸得香脆入味嘅海蝦，異常滋味。有囍沙薑雞 ($168/半隻)，肉質嫩滑，雞味十足。讚！薑蔥美國桶蠔 ($198)熱辣辣上枱，桶蠔肥美夠juicy，經過爆炒嘅薑蔥吸埋蠔嘅鮮味，超正。歎啲咁惹味嘅小菜，梗係要啤一啤佢，青島 ($28)。呢餐食得好滿足，咁有特色嘅小館，值得再嚟試試。