滷友記 (加路連山道) (已結業)

難得同男朋友一齊放假，當然要出去食好嘢☺️。我哋喺網上面搵到有間特色嘅滷水+台式餐廳，唔單止環境好，而且食物嘅comment都唔錯，所以我哋就決定今日嚟呢度食飯😋雞絲粉皮- 份量好大份，雞絲同粉皮嘅比例係一比一。每一啖都有雞絲係入面！粉皮口感滑溜，加埋自製嘅芝麻花生醬汁一齊食。味道豐富。正！😋溏心蛋肉燥飯- 呢個真係超好食，肉燥味道啱啱好，唔會覺得太鹹。而且十分足料。有大量半肥瘦豬肉，所以豬肉嘅味道非常濃郁。加埋半熟嘅溏心蛋同白飯一齊食。啱啱好中和肉燥呢濃味。超正！😋台式酥炸雞扒飯- 雞扒香脆可口，仲有好濃郁嘅雞味。廚師將雞扒炸到好乾身，完全冇油膩嘅感覺。但咬開嘅時候，入面仲有好多粒肉汁流出黎。我真係勁鍾意！😋炸秋葵- 秋葵炸到脆卜卜。口感絕對係外脆內軟，味道仲好鮮甜。再加少少沙律醬係上面，秋葵嘅味道更加提升！真係唔錯！😋買單嘅時候，仲見到餐廳自家製醬汁。 知道自家製一定唔會差！我地就即刻俾錢買咗樽！