Typical嘅日式居酒屋裝修風格，整體而言，刺身/水產新鮮，質素甚佳。
奉送沙律及面豉湯，沙律都係簡單以羅馬生菜及粟米加胡麻沙律醬。
花錦魚生丼 ($188): 魚生包括三文魚、白身魚、赤蝦、右口魚邊、金蟹籽、三文魚籽、櫻花蝦、蟹膏豆腐、松葉蟹、蜆肉、玉子漬、甜蛋，以及青瓜。
非常豐富嘅一個丼飯，魚生均切成粒狀，每一口都包括數款材料，味道層次都幾豐富。魚生普遍新鮮，例如赤蝦晶瑩剔透，爽滑彈牙；右口魚邊入口即化；松葉蟹肉鮮甜美味。
夢之丼 (298): 本店招牌夢之丼飯嘅刺身魚生分別有三文魚蓉、三文魚籽、帆立貝、牡丹蝦、海膽、松葉蟹，以及右口魚邊。
食材比花錦魚生丼稍微升級，海膽creamy奶滑，味道鮮甜；帆立貝嫩滑清甜；三文魚籽粒粒飽滿，鮮而不腥；松葉蟹、牡丹蝦，以及右口魚邊與魚生丼一樣，但牡丹蝦係原隻上，並無切粒。
另外單點左幾款前菜/刺身/壽司，估唔到仲咁有心機幫我地擺埋盤......
蟹皇醬燒蟹膏豆腐 ($48): 質感幼滑，但唔會一夾就散，味道方面，豆醬釀入左非常鮮香嘅蟹膏，頗有特色。
左口魚邊壽司 ($96): 左口魚魚油豐富，經微微火炙後把魚油逼出，食起上黎更香，且入口即化。
赤貝刺身 ($58): 爽滑彈牙，帶微微咸香。
深海池魚刺身 ($78): 深海池魚肉質肥美鮮嫩，魚油甘香細膩，食Omakase普遍都有佢嘅蹤影。
