十二味不只是烤魚 (已結業)

今日約左幾個好鐘意食川菜既朋友，去大家住既中心點紅磡食飯。一早BOOK好曬怕星期六晚無位，點知帶路果個唔識路去左大酒店果邊，行左成半個鐘先揾到，原來係媽咪雞蛋仔附近……真係行都行到餓 黎到緊係叫個魚啦，師奶心態又黎，通常就叫個招牌，但江團魚同沙巴龍躉係差20蚊，有個就話一係食鯰魚平多D，搞左好耐，最後都叫沙巴龍躉……難得一齊出黎食要食好D 雖然唔鐘意食辣嘢，但係食得川菜走辣都好奇怪，所以都叫左個少辣。但一上既時候都嚇親，洗唔洗咁好，好彩都唔係好辣。不過都即時叫左碗水，侍應好好，俾左一碗熱水我。 條魚係好好食，我最鐘意食腩位，最滑，起初叫到得好少，原來仲有一邊，真係俾捉成條。但好似無平時係酒樓既沙巴龍躉咁彈牙，可能酒樓用果D係大條D，早知都係叫鯰魚，反正都係食佢既味。味道我自己覺得好夠，朋友都話OK, 仲話個薯粉太早落，唔係仲正。豆腐都好正，勁滑。 拍唔夠飽，仲叫左個向陽牛肉炒寛粉，呢個唔辣，我勁鐘意，明顯地我地都係薯粉達人。不過我覺得油左少少，但川菜既特色就係咁。 飲品我叫左佢既推介桂花冰釀，係幾特別，鐘意桂花味既人會好鐘意，我都係見多人叫先試下，但我自己可能唔好桂花，所以覺得一般。